Вакцинация

Вакцинация – баланың денсаулығын алғашқы күндерден бастап қорғаудың сенімді жолы

Бала денсаулығына қамқорлық оны алғаш рет емханаға апарғанға дейін басталуы керек. Соның бір маңызды бөлігі – уақытында және ғылыми дәлелденген екпе алу.

Сәби өмірінің алғашқы жылдарында иммунитеті әлсіз болады, сондықтан жұқпалы аурулар оған өте қауіпті. Кейбір инфекциялар ересек адамда жеңіл өтсе де, кішкентай балаларда ауыр асқынуларға – жүйке жүйесінің зақымдануына, мүгедектікке немесе тіпті өміріне қауіп төндіретін жағдайларға әкелуі мүмкін. Қызылша, көкжөтел, сіреспе, полиомиелит сияқты аурулар әсіресе сәби жасында өте қауіпті.

Қазіргі медицинада вакциналардың тиімділігі мен қауіпсіздігін дәлелдейтін нақты ғылыми деректер жеткілікті. Екпенің арқасында бұрын балалардың өміріне қауіп төндірген жұқпалы аурулардың таралуы айтарлықтай азайды, кейбірі мүлде жойылды.

Дүниежүзілік денсаулық сақтау ұйымының дерегіне сай, вакцинация жыл сайын әлем бойынша 3–5 миллион адамның өмірін сақтап қалады. Бұл – халық денсаулығын қорғаудағы ең сенімді тәсілдердің бірі.

Барлық вакциналар бірнеше кезеңнен тұратын сапа тексерісінен өтеді және өндірістен бастап қолданылғанға дейін қатаң бақылауда болады. Қазақстанда барлық екпе Ұлттық егу күнтізбесіне сәйкес тегін жүргізіледі. Бұл күнтізбе халықаралық стандарттарға сай жасалып, әр баланың жасына және қажеттілігіне бейімделген.

Соңғы 30 жылда балаларды вакцинациялауға бағытталған Ұлттық саясаттың нәтижесінде эпидемиялық паротитпен сырқаттану 100 есеге, вирусты А гепатиті — 32 есеге, вирусты В гепатиті — 92 есеге азайды. Қызылша мен қызамық 90%-дан астам төмендеді.

Бүгінде әр ата-ананың өз баласын өмірінің алғашқы айларынан бастап қорғауға мүмкіндігі бар. Бұл – жай ғана медициналық шара емес, бұл – баланың болашағына, отбасының амандығына және елдің денсаулығына жасалған маңызды қадам.